Se queres sorprender ao teu mozo ou moza podes gozar dun doce almorzo na Ferraría, as migallas que vos caian no xersei podedes darllas para comer ás pombas...

Preocupada ou preocupado por romper o xeo na vosa relación? Tedes todo un centro histórico para perdervos polas súas rúas... O arco de Méndez Núñez é unha opción para os máis tímidos, pero os auténticos PTV fanse as beiras na áncora das palmeiras da alameda.

Se queres demostrarlle que es un amante da natureza podes levar á túa parella a un paseo do máis bucólico ao Pazo de Lourizán. Sabías que hai unha mesa de granito dunha soa peza sacada dun penedo da Illa de Tambo? Veña, xa tes o primeiro dato, que o chío dos paxariños vos acompañe!

Un brinde polo voso amor! O primeiro que sexa na praza da Verdura, o segundo na praza da Leña, o terceiro na praza do Teucro, o cuarto na praza de Méndez Núñez e o quinto na praza da Ferraría. Tes cinco denominacións de orixe galegas que probar, os agarimos están asegurados!

Hai algo máis fermoso que un paseo pola praia? Podedes achegarvos ata a nosa praia fluvial do río Lérez, onde a auga calma e o silencio serán a banda sonora perfecta para os vosos bicos. O paseo ata aí pola Illa do Covo tampouco ten desperdicio.

Se che falta amor, podes respirar aire fresco e namorarte, por que non, de Pontevedra e das súas vistas no miradoiro de Monte Porreiro. Tamén podes ir abrazar as árbores da Illa do Covo, pero iso xa son cousas túas.

O amor dá moita fame, e se non que llo pregunten ás bolboretas que dan voltas na túa barriga. Facede un pícnic romántico no lago de Castiñeiras, tombados á fresca na herba, cos raios de sol quentando os vosos corpos (e os vosos corazóns!).

Cada parella ten a súa canción, podedes buscar a vosa nun concerto, ou talvez nalgún pub, podedes atopala nun agarradiño dunha orquestra ou nunha canción do noso Festival Internacional de Jazz.

Un vasiño de licor café quenta as almas e espanta as meigas. Se aínda tedes medo podedes compartir cama no Parador de Pontevedra.

Achegádevos ata A Caeira, e observade as luces da cidade, as pontes sobre o Lérez e pedide desexos a algunha estreliña. Non esquezades o voso pau para facer autofotos; as vistas dan para fotazas!