Centro histórico

Visit Pontevedra

O centro histórico é o corazón de Pontevedra, o lugar no que teñen lugar a maioría dos acontecementos sociais e o principal escenario patrimonial e histórico da cidade. Forma parte do Patrimonio Histórico Artístico do Estado e tense por un dos mellor conservados de Galiza. Pazos, igrexas, conventos, casas tradicionais e de avoengo, labras heráldicas, fontes ou cruceiros sucédense ininterrompidamente ao longo do seu entramado de rúas e prazas, onde pequenos tesouros agardan o ollo curioso.

 

O centro histórico de Pontevedra, declarado Conxunto Histórico-Artístico en 1951, é un dos mellores conservados de Galiza, e testemuña indiscutible do esplendor medieval da cidade, cando Pontevedra aínda estaba profundamente ligada ao mar.

A beleza das súas rúas e prazas seducen a todo aquel que as visita, entre casas populares e de avoengo que revelan o pasado da cidade, con importantes mostras arquitectónicas que conservan o encanto de tempos pasados. Durante todo o paseo quedará patente o pasado fidalgo de Pontevedra, ao camiñar ao paso dos numerosos brasóns que ocupan as fachadas de todo o centro histórico.

A praza da Leña, onde outrora vendíase a leña para quentar as cociñas, recolle os tres pazos que actualmente albergan parte do Museo Provincial, recoñecido como un dos museos máis representativos da historia, a arqueoloxía e a arte galega. A un paso, a praza de Verdura —onde ata hai poucos anos podíanse mercar os produtos do campo— convértese nun dos centros neurálxicos da vila, punto de encontro para tomar un refrixerio antes de continuar o paseo ata a praza do Teucro, nome do arqueiro grego ao que se lle atribúe a fundación de Pontevedra.

Baixando ata a beira do río chegamos á praza de Mugártegui —xusto antes de chegar ao mercado de abastos— onde se atopa o pazo que actualmente ocupa a sede do Consello Regulador da Denominación de Orixe Rías Baixas, bandeira do coñecido viño albariño da zona. Seguindo o percorrido, na parte máis alta do centro histórico, atopamos a espectacular praza da Ferraría, onde antigamente os artesáns traballaban a forxa. Hoxe é lugar de encontro de moitos dos espectáculos que se organizan na cidade e acolle, entre outros edificios, o Convento de San Francisco, cos seus fermosos xardíns.

Ademais de pola representatividade e polo excelente estado de conservación da súa arquitectura civil, o centro histórico de Pontevedra destaca pola súa non menos importante arquitectura relixiosa. Así, as ruínas do antigo Convento de San Domingos, a pesar de que hoxe só se conserva parte do seu esqueleto externo e a cabeceira do antigo templo, son consideradas o mellor expoñente do gótico galego.

Preto das ruínas de San Domingos atópase a Basílica de Santa María a Maior, declarada Monumento Nacional, da que cabe subliñar a portada plateresca de excelente talla mandada construír polo antigo Gremio de Mareantes no século XV, onde aparece representado o Cristo da Boa Viaxe, ao que os mariñeiros se encomendaban antes de partir ao mar.

Tamén cómpre sinalar varias igrexas conventuais representativas, como a de San Francisco, a da Peregrina, con planta en forma de cuncha de vieira como símbolo dos camiños xacobeos- e, algo máis lonxe, máis abaixo da praza da Leña, as de San Bartolomeu e de Santa Clara.

O centro histórico está atravesado polo Camiño Portugués a Compostela, que entra desde a praza da Peregrina pola antiga Porta de Trabancas, pasa polos Soportais da Ferraría, a praza de Curros Enríquez e a Rúa Real, para desembocar na zona dos vellos peiraos na Ponte do Burgo. Aquí, na zona de confluencia co río Lérez, poden contemplarse os achados arqueolóxicos (cuxa orixe se remonta á época romana) que se atoparon nas escavacións de reforma da praza de Valentín García Escudero.

Pontevedra Monumental

Ao longo desta sinxela ruta poderase coñecer de preto algúns dos máis belos recunchos da nosa cidade. Trátase dun percorrido que recolle os puntos de interese turístico do centro histórico de Pontevedra.

Visit-Pontevedra - Concello de Pontevedra Turismo de Pontevedra S. A.
CASA DA LUZ
Praza da Verdura s/n
36002 - Pontevedra
+34 986 090 890
Este enderezo de correo está a ser protexido dos robots de correo lixo. Precisa activar o JavaScript para velo.
  
Top

© 2017 Turismo de Pontevedra. Concello de Pontevedra.
Todos os dereitos reservados