10 razóns para vir

Visit Pontevedra

1

Perderse por un dos Centros Históricos máis importantes de Galicia

Declarado Conxunto Histórico-Artístico en 1951, o centro histórico de Pontevedra é un dos mellor conservados e de maior extensión de Galiza, fiel testemuña do esplendor medieval da cidade, cando aínda estaba profundamente ligada ao mar.
A beleza das súas rúas e prazas marabilla a todo aquel que as visita. O pasado fidalgo de Pontevedra é patente ao camiñar ao paso dos numerosos brasóns e escudos heráldicos que ocupan as fachadas de casas populares e de avoengo.

2

Pasear pola cidade que camiña

Pontevedra é unha cidade que vai a pé. De peregrinos e peregrinas que a cruzan de sur a norte, cara a Compostela. Pero tamén de xente que gusta de camiñar cada día, porque saben que a rúa ou a praza na que viven é a continuación da propia casa.

3

Comprobar como é unha cidade na que os peóns son os protagonistas

Pontevedra deixou de ser un espazo invadido polos coches. Hoxe é unha ecocidade, referente internacional da calidade urbana e sustentabilidade. O espazo que ocupaban os coches agora é utilizado para favorecer a mobilidade da xente. Os carriños de bebés, as cadeiras de rodas e as bicicletas poden atravesar a cidade sen obstáculos. Todo o centro histórico e diversas zonas comerciais están pechados ao tráfico, excepto servizos e residentes, o que permite pasear, relaxarse e fotografar libremente e sen medo a ser atropelado. Ademais, Pontevedra é, desde 2011, a primeira cidade coa velocidade limitada a 30 km por hora en todas as vías do seu territorio urbano.

4

Saborear a gastronomía local

A capital das Rías Baixas destaca tamén pola súa boa gastronomía. Demóstrano os centos de locais espallados por todas as prazas e xardíns da cidade, onde se pode degustar a calidade dos produtos do mar e da terra, tanto nas elaboracións tradicionais como nas propostas dos novos valores da cociña galega.

5

Terracear, ben sexa de día ou de noite

A cidade é un gran escenario urbano para o lecer que se enche de festa a cada paso e que se converte nun espléndido marco para o café, o vermú, unha cervexa ou unha copa. Tanto se é de día como de noite, sempre apetece gozar do ambiente das concorridas terrazas. Isto é vida!

6

Mercar nun gran centro comercial urbano

Pontevedra non é unha cidade nin demasiado grande nin demasiado pequena. Pódese percorrer perfectamente a pé, tanto o centro turístico como os seus arredores.
Os pequenos comerciantes de Pontevedra forman unha grande área comercial urbana cómoda e accesible, cunha oferta ampla e variada nun ámbito que convida a comprar tranquilamente. Pontevedra Capital Shopping.

7

Descubrir os tesouros que custodia o Museo de Pontevedra

Está considerado como un dos museos provinciais máis importantes do estado español, tanto pola riqueza como pola variedade das súas coleccións; entre elas destacan a de ourivaría prehistórica, o famoso tesouro de ouro de Caldas, o máis importante depósito de machadas de bronce do talón, a máis valiosa colección de acibeches de España, cruces parroquiais, unha preciosa colección de cerámica de Sargadelos ou a obra case completa de Castelao, un dos seus fundadores.

8

Gozar dunha ampla e variada oferta cultural e de lecer

A cultura zumega por cada pedra. A ampla e variada oferta cultural e de lecer está impulsada polo potente ciclo festivo anual e a programación habitual, tanto de entidades oficiais como privadas, de grandes exposicións e de pequenos concertos. O espazo público invádese a cada pouco con citas como o Festival Internacional de Jazz e Blues, a Feira Franca, o Itineranta (teatro de rúa), a Peregrina, o Surfing The Lérez, o maior Entroido urbano de Galicia e outras convocatorias ao longo de todo o ano. Plástica, teatro, música, novas expresións, moda e variados cursos e congresos que enchen de vida a cidade.

9

Relaxarse en contacto coa natureza

Sentir os raios do sol, mirar as árbores, escoitar o son do vento e da auga, respirar aire puro, tocar e cheirar as plantas ao redor, contemplar as fermosas vistas dunha paraxe natural, desconectar da rutina… Pontevedra alberga unha intensa oferta de propostas de lecer en contacto coa natureza.

10

Sentir a cálida acollida das súas xentes

Di a estrofa da cantiga popular que “Pontevedra é boa vila, dá de beber a quen pasa. A fonte na Ferrería, San Bartolomeu na praza”. E efectivamente este dito expresa á perfección a esencia da cidade: a hospitalidade. Pontevedra, cidade acolledora e cordial, pasou de cruzamento de camiños a lugar de encontro, e todos poden gozar dela, da súa historia… e da súa auga.

Visit-Pontevedra - Concello de Pontevedra Turismo de Pontevedra S. A.
CASA DA LUZ
Praza da Verdura s/n
36002 - Pontevedra
+34 986 090 890
Este enderezo de correo está a ser protexido dos robots de correo lixo. Precisa activar o JavaScript para velo.
  
Top

© 2017 Turismo de Pontevedra. Concello de Pontevedra.
Todos os dereitos reservados