Pontillón do Castro

Visit Pontevedra

Situado na parroquia de Verducido, conforma en si mesmo unha rota de esparexemento no medio natural. Un paseo accesible a pé, en bicicleta e en cadeira de rodas arrodea o embalse a través dun camiño que ascende ao monte do Castro nun área de bosque autóctono recuperado polo Plan Monte Vivo. En total son 3,5 km de sendas ao norte do concello, nun espazo no que se sitúa unha pista de competicións de piragüismo.

O Parque Forestal do Pontillón do Castro está situado na parroquia de Verducido, ao norte do territorio municipal. Desprégase arredor do embalse do Pontillón do Castro, unha infraestrutura hídrica do sistema de abastecemento de augas da capital, e onde tamén se asenta o importante centro deportivo especializado en piragüismo, que constitúe toda unha instalación de referencia no estado español.

Aquí tamén está o outeiro do Castro, un mato anexo coroado por unha interesante escultura xigante realizada en homenaxe aos canteiros da zona.

O Pontillón ofrece tres sendeiros moi aptos para un paseo tranquilo e reparador, nun contorno bastante relaxante:

- O do Embalse: con máis dun quilómetro de lonxitude, está salpicado de pequenas terrazas sobre a auga e espazos para a pesca sen morte. O traxecto parte da instalación deportiva e chega ata a estrada do encoro do Pontillón, unha obra de enxeñaría construída a mediados do s. XX.

- O do Encoro: trátase dunha pequena senda que decorre o mato existente entre a instalación deportiva e o propio encoro; é utilizado pola xente para contemplar as probas deportivas que aquí se desenvolven.

- O do Castro: abranguen un conxunto de sendas que percorren os bosques deste monte arrodeado polo río Rons. Os camiños do paseo chegan ata a cima do monte, onde se sitúa unha escultura de homenaxe aos canteiros.

Nos arredores da estrada que une Barro con Santa María e Santo André de Xeve existe unha zona de descanso, con parque infantil e un área de merendas, ademais de varias plataformas para aparcar automóbiles.

Á metade do percorrido da senda do embalse existe tamén un rocódromo ao aire libre, se ben para utilizalo é preciso estar federado.

O do Pontillón do Castro foi o primeiro parque desenvolvido no marco da iniciativa Monte Vivo, un plan que serviu para restaurar numerosos espazos forestais afectados pola vaga de incendios de 2006.

Visit-Pontevedra - Concello de Pontevedra Turismo de Pontevedra S. A.
CASA DA LUZ
Praza da Verdura s/n
36002 - Pontevedra
+34 986 090 890
Este enderezo de correo está a ser protexido dos robots de correo lixo. Precisa activar o JavaScript para velo.
  
Top

© 2017 Turismo de Pontevedra. Concello de Pontevedra.
Todos os dereitos reservados